លោករដ្ឋមន្រ្តីថា ខណៈពេលដែលថៃបានព្យាយាមបំភ្លៃព័ត៌មានពីកម្ពុជាឱ្យអន្តរជាតិមានការយល់ច្រលំពាក់ព័ន្ធជម្លោះព្រំដែន កម្ពុជាក៏ត្រូវតែឆ្លើយតបវិញដែរតាមរយៈការផ្តល់ព័ត៌មានពិតឱ្យពលរដ្ឋនិងអន្តរជាតិបានឃើញថា អ្វីដែលថៃកំពុងប្រព្រឹត្តគឺការប្រើប្រាស់ព័ត៌មានក្លែងក្លាយលាបពណ៌លើកម្ពុជា។

តាមរយៈការតាមដានជុំវិញប្រព័ន្ធផ្សព្វផ្សាយថៃកន្លងមក គឺអ្នកសារព័ត៌មានថៃបានបង្កើតនូវភាពមន្ទិល និងបំប៉ោងព័ត៌មានខុសពីការពិត។ ដូច្នេះលោកបានស្នើដល់ប្រព័ន្ធផ្សព្វផ្សាយថៃ ឱ្យប្រកាន់នូវក្រមសីលធម៌វិជ្ជាជីវៈសារព័ត៌មានឱ្យបានត្រឹមត្រូវ ការផ្សព្វផ្សាយត្រូវប្រកាន់នូវសច្ចៈភាពនៃព័ត៌មាន ភាពត្រឹមត្រូវនៃព័ត៌មាន ហើយសូមកុំឱ្យបញ្ចូលនូវនិន្នាការនយោបាយនៅក្នុងព័ត៌មានរបស់ខ្លួន។ រដ្ឋមន្រ្តីក្រសួងព័ត៌មានលើកឡើងបែបនេះក្នុងសន្និសីទសារព័ត៌មានថ្ងៃទី២១ ខែកក្កដា ឆ្នាំ២០២៥។

គួរកត់សម្គាល់ថា ចាប់តាំងពីផ្ទុះឡើងនៅភាពតានតឹងតាមបណ្តោយព្រំដែនសារជាថ្មីកាលពីថ្ងៃទី២៨ ខែឧសភា ឆ្នាំ២០២៥ បណ្តាញសារព័ត៌មានថៃភាគច្រើន រាប់ទាំងសារព័ត៌មានជាភាសាអង់គ្លេសផងត្រូវបានប្រើប្រាស់ជាមធ្យោបាយបញ្ចេញព័ត៌មានក្លែងក្លាយ បំផ្លើសបំភ្លៃ បំពុលសង្គម លាបពណ៌មកលើកម្ពុជាទាំងទទឹងទិស ដោយមិនខ្វាយខ្វល់ពីក្រមសីលធម៌វិជ្ជាជីវៈទាល់តែសោះ។

ក្នុងមួយថ្ងៃៗពួកគេតែងបញ្ចេញព័ត៌មានដែលគ្មានប្រភពច្បាស់លាស់ ព័ត៌មានដែលមានលក្ខណៈគាំទ្រនយោបាយរបស់កងទ័ពដោយបំភិតបំភ័យ ចោទប្រកាន់ មួលបង្កាច់ ទម្លាក់កំហុសមកលើកម្ពុជាដើម្បីបិទបាំងអំពើបាញ់ប្រហារសម្លាប់កងទ័ពខ្មែរ និងនយោបាយឈ្លានពានរបស់ខ្លួន។