រតនគិរី៖ ដែនជម្រកសត្វព្រៃស្រុកលំផាត់ ខេត្តរតនគិរី កំពុងត្រូវបាន លោកស្រី អេង ស្រីពៅ ដែលជាភរិយារបស់ឧកញ៉ា តាយ សេង សម្រុកដាក់គ្រឿងចក្រឈូសឆាយយ៉ាងរង្គាល។

ប្រជាពលរដ្ឋដែលរស់នៅក្នុងឃុំសេដា ស្រុកលំផាត់ បានរាយការណ៍មកថា នៅដើមឆ្នាំ ២០២៥នេះ ភរិយាឧកញ៉ា តាយ សេង បានចល័តយកគ្រឿងចក្រជាច្រើនគ្រឿង សម្រុកចូលមកឈូសឆាយកាត់ផ្ដួលរំលំព្រៃឈើ យ៉ាងមហន្តរាយ។

ក្នុងករណីដែលក្រុមឈ្មួញបានដាក់គ្រឿងចក្រ ធ្វើការឈូសឆាយនោះ ពលរដ្ឋលើកឡើងថា គឺស្ថិតក្នុងភូមិកែងសាន់ឃុំសេដា ស្រុកលំផាត់ខេត្ត រតនៈគិរី។ ប្រភពប្រជាពលរដ្ឋនៅតំបន់នោះ បានបន្តឲ្យដឹងទៀតថា បច្ចុប្បន្នផ្ទៃដីដែលឈ្មួញកាត់ផ្ដួលរំលំឈូសឆាយរុញឈើ ប្រមូលផ្ដុំដុតសំអាត បានប្រហែលពី៣០០ ទៅ៥០០ហិកតាហើយ។

ទាក់ទិនករណីនិងការឈូសឆាយដីព្រៃខាងលើនេះ លោក ផុន ខេមរិន្ទ ប្រធានមន្ទីរបរិស្ថានខេត្តរតនគិរី បានឲ្យដឹងតាមប្រព័ន្ធទូរសព្ទ នៅព្រឹកថ្ងៃទី១១ ខែមីនា ឆ្នាំ២០២៥ យ៉ាងខ្លីថា «បងដឹងច្បាស់យ៉ាងម៉េចមើលទៅ បើគេមានច្បាប់មានការអនុញ្ញាត ខ្ញុំមិនអាចឆ្លើយលើសពីហ្នឹងបានទេ សូមបងសួរទៅមន្ទីររៀបចំដែនដីទៅ។»

ដោយឡែក លោក លី ឧសភា ប្រធានមន្ទីររៀបចំដែនដីនគររូបនីយកម្ម និងសំណង់សុរិយោដីខេត្តរតនគិរី បានប្រាប់ឱ្យក្រុមការងារ CNC សាកសួរជាមួយអាជ្ញាធរស្រុក។

ជុំវិញដែលបុគ្គលឯកជនយកគ្រឿងចក្រ ចូលឈូសឆាយកាត់ដីព្រៃនេះដែរ លោក សឿង ខេមរៈ ប្រធានដែនជំរកសត្វព្រៃលំផាត់ បានឱ្យដឹងតាមប្រព័ន្ធទូរសព្ទ នៅព្រឹកថ្ងៃទី ១១ ខែមិនាឆ្នាំ ២០២៥នេះថា ដីដែលកំពុងឈូសឆាយនោះ ពិតជាដីនៅក្នុងដែនជម្រកសត្វព្រៃមែន តែគេធ្វើប្លង់រួចហើយ បើអ្នកសារព័ត៌មានចង់ដឹងច្បាស់ ឲ្យទៅសួរម្ចាស់ផ្ទាល់ ម្ចាស់គេឈ្មោះ ឧកញ៉ា តាយ សេង។

ដោយឡែក លោក ស្រី អេង ស្រីពៅ ដែលជាភរិយារបស់ លោកឧកញ៉ា តាយ សេង បានបញ្ជាក់តាមប្រព័ន្ធទូរសព្ទ នៅរសៀលថ្ងៃទី ១១ខែមីនាឆ្នាំ ២០២៥នេះថា ដីព្រៃឈូសឆាយខាងលើ ពិតជាដីរបស់លោកស្រី ពិតប្រាកដមែន ដោយលោកស្រីមានប្លង់រឹងពិតប្រាកដ ពីមន្ត្រីជំនាញ ដែលបានចេញឲ្យលោកស្រី មានប្រមាណជាង ៥០០ហិកតា៕