ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ប្រកាសឲ្យអ្នកដែលបានបង្កើតគណនី TikTok ដោយប្រើប្រាស់ឈ្មោះរបស់សម្ដេច ដើម្បីមកជួប និងសុំយកមកគ្រប់គ្រងវិញ ក្រោយសម្ដេចមើលឃើញថា អ្នកដែលបង្កើតនេះគ្មានចេតនាអាក្រក់នោះទេ។ 

តាមរយៈសំឡេងនៅវេលាថ្ងៃត្រង់ ថ្ងៃទី២៩ ខែមិថុនា ឆ្នាំ២០២៣, សម្ដេចតេជោ ហ៊ុន សែន បានថ្លែងថា ប្រសិនបើត្រូវបិទចោលនូវគណនីដែលមានឈ្មោះរបស់សម្ដេចស្រាប់នោះ វាជារឿងដែលគួរឲ្យស្ដាយដោយសារគណនីនោះ មានអ្នកតាមដានរហូតដល់ជាង៣០ម៉ឺននាក់ និងអ្នកចុច like ជាង៤លាននាក់ឯណោះ។ 

សម្ដេចតេជោនាយករដ្ឋមន្ដ្រី បានណែនាំឲ្យអ្នកដែលបង្កើតគណនីនោះ ទៅជួបផ្ទាល់ជាមួយលោក ដួង តារា រដ្ឋលេខាធិការទីស្ដីការគណៈរដ្ឋមន្ដ្រី ដែលជាជំនួយការរបស់សម្ដេច ដើម្បីពិភាក្សាការងារនេះ ហើយសម្ដេចថែមទាំងផ្ដល់តួនាទីជាជំនួយការរបស់សម្ដេចទៀតផង។ 

សម្ដេចតេជោ លើកឡើងថា ក្នុងករណីសម្ដេចទទួលបានគណនី TikTok នោះយកមកគ្រប់គ្រងវិញ សម្ដេចអាចនឹងបញ្ឈប់ការប្រើប្រាស់គណនីថ្មីដែលទើបបង្កើត ហើយបន្ដប្រើប្រាស់គណនីចាស់ ដែលមានអ្នកតាមដាន និងចុច like ស្រាប់ដើម្បីផ្ដល់ភាពងាយស្រួលដល់អ្នកដែលតាមដាន និងមានសកម្មភាពរបស់សម្ដេចស្រាប់។ 

«គណនី TikTok នោះមានអ្នកចូលគាំទ្រច្រើន ដោយសារប្រើប្រាស់រូបភាព និងឈ្មោះរបស់ខ្ញុំ ពិសេសបានបង្ហោះរាល់សកម្មភាពទាំងវីដេអូ និងរូបភាពរបស់ខ្ញុំតែម្ដង»៕ នេះជាប្រសាសន៍បញ្ជាក់របស់សម្ដេច ហ៊ុន សែន៕