(ខេត្តឧត្តរមានជ័យ)៖ ប្រភពច្បាស់ការពីប្រជាពលរដ្ឋបានរាយការណ៍ប្រាប់មកដល់អ្នកសារព័ត៌មានយើងខ្ញុំថា មានទីតាំងល្បែងស៊ីសងជល់មាន់តាមប្រព័ន្ធទូរទស្សន៍អនឡាញក្នុងហាងកាហ្វេនៅក្នុងស្រុកអន្លង់វែង ខេត្តឧត្តរមានជ័យ បានបើកដំណើរការលេងជារៀងរាល់ថ្ងៃប្រជុំក្រុមញៀនល្បែងមកលេងយ៉ាងគគ្រឹកគគ្រេង ស្រែកហ៊ោកញ្ជ្រៀវមិនខ្វល់ពីអាជ្ញាធរមូលដ្ឋាននិងសមត្ថកិច្ចពាក់ព័ន្ធចុះបង្ក្រាបឡើយ។

ពលរដ្ឋមានការងឿងឆ្ងល់ថា តើហេតុអ្វីទីតាំងល្បែងស៊ីសងខាងលើនេះលេងបានយ៉ាងរលូនដូច្នេះ? ពួកគាត់បានការសង្ស័យថា អាជ្ញាធរមូលដ្ឋាននិងសមត្ថកិច្ចបើកភ្លើងខៀវឱ្យម្ចាស់ ទីតាំងគៀងគរប្រមូលបក្សពួកមកជួបជុំគ្នាលេងហើយមើលទៅទើបមិនចុះទប់ស្កាត់និងបង្ក្រាប។

សូមបញ្ជាក់ផងដែរថាកន្លងមកក្រុមការងារសារព័ត៌មានក៏បានធ្លាប់រាយការណ៍ជូនអធិការស្រុកអន្លង់វែងដែរចំពោះបញ្ហាល្បែងស៊ីសងខាងលើប៉ុន្តែរហូតដល់ថ្ងៃទី 09 ខែមិថុនា ឆ្នាំ2022 នេះ នៅតែមិនមានវិធានការបង្ក្រាបនៅឡើយ តើមានអ្វីជាអាថ៌កំបាំងនៅពីក្រោយល្បែងស៊ីសងមួយនេះ?

ដូច្នេះហើយប្រជាពលរដ្ឋដែលរស់នៅស្រុកអន្លង់វែងបានស្នើសុំដល់លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ សូមជួយត្រួតពិនិត្យនិងចាត់មន្ដ្រីជំនាញក្រោមឱវាទឱ្យធ្វើការទប់ស្កាត់និងបង្ក្រាបផងទានដើម្បីឱ្យស្របតាមគោលនយោបាយភូមិ ឃុំមានសុវត្ថិភាពទាំង 7 ចំណុចដែលបានដាក់ចេញទៅដោយក្រសួងមហាផ្ទៃ៕