ខេត្តកែប ៖ តាមប្រជាពលរដ្ឋបានរាយការណ៍កាលពីថ្ងៃទី២០ ខែមិថុនា ឆ្នាំ២០២២ថា នៅចំណុចភូមិអំពែង ឃុំអង្កោល ស្រុកដំណាក់ចង្អើរ ខេត្តកែប មានបុគ្គលម្នាក់ឈ្មោះ ហាក់ បានចាក់ដីលុបឆ្នេរសមុទ្រទាំងបំពាន ខណៈដែលប្រជាពលរដ្ឋសម្ដែងការហួសចិត្តយ៉ាងខ្លាំង ចំពោះអាជ្ញាធរដែលអសមត្ថភាពក្នុងការទប់ស្កាត់ និងមិនហ៊ានចុះបង្រ្កាប។

លោក ហាក់ និងក្រុមគ្រួសារបានប្រាប់អ្នកយកព័ត៌មានយើងថា គាត់ចាក់ដីនេះ ដោយសារតែពួកគាត់អត់មានសាងសង់កន្លែងឱ្យកូនរស់នៅ ហើយអាជ្ញាធរស្រុក ធ្លាប់មកហាមឃាត់ ពីរដងរួចមកហើយ ។

អភិបាលស្រុកដំណាក់ចង្អើរ លោកស្រី គឹម ចាន់នី បានថ្លែងប្រាប់អ្នកយកព័ត៌មានយើងថា ដីដែលកំពុងសាងសង់សំណង់រឹងនេះ គឺពុំមានច្បាប់ទម្លាប់នោះទេ។ លោកស្រីបន្តទៀតថា បើបង្ក្រាបបទល្មើសមិនបានមិនដឹងធ្វើអាជ្ញាធរយ៉ាងម៉េចទេ ហើយឥឡូវនេះ លោកស្រីកំពុងរង់ចាំបទបញ្ជាពីថ្នាក់លើ។

ជុំវិញករណីខាងលើនេះ សារព័ត៌មានយើងមិនអាចសុំការបំភ្លឺពីលោកប្រធានមន្ទីរសុរិយោដីខេត្តកែបបាននោះទេ ដោយសារទូរស័ព្ទ របស់លោកមិនអាចទំនាក់ទំនងបានទេ។ ចំណែកប្រធានមន្ទីរកសិកម្មរុក្ខាប្រមាញ់ និងនេសាទខេត្តកែបក៏មិនអាចទំនាក់ទំនងបានដែរ។ ដោយឡែក ឯឧត្តម សោម ពិសិដ្ន អភិបាលខេត្តកែបក៏មិនអាចទំនាក់ទំនងបានដែរ។

ពាក់ព័ន្ធករណីនេះដែរ ប្រជាពលរដ្ឋនៅខេត្តកែបមួយចំនួនបាននាំគ្នានិយាយរិះគន់ទៅលើអាជ្ញាធរស្រុកដំណាក់ចង្អើរថា ការងាររបស់ពួកគាត់សព្វថ្ងៃនេះ ធ្វើដូចជាឆាកល្ខោនមួយបំភ័ន្តភ្នែកប្រជាពលរដ្ឋ និងថ្នាក់ដឹកនាំខាងលើ៕