ក្រោយពីទទួលបានព័ត៌មានពីម្ដាយជនរងគ្រោះតាមរយៈទូរស័ព្ទថា មានចោរចំនួនពីរនាក់ ជិៈម៉ូតូហុងដាវេវ ពណ៌ស ក្នុងនោះមានម្នាក់មានស្នាមសាក់ពេញមុខ និងសាក់ចិញ្ចើម ជាអ្នកធ្វើសកម្មភាពលួចយកម៉ូតូរបស់កូនគាត់។

ក្រោយពីទទួលព័ត៌មាន និងទទួលបានភិនភាគ
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថ ក្រុងប៉ោយប៉ែត បានចាត់កម្លាំងធ្វើការស្រាវជ្រាវរហូតកំណត់មុខសញ្ញាបាន ហើយបន្តប្រតិបត្តិការរហូតដល់២០និង៤០នាទី ថ្ងៃទី២១ខែមករាឆ្នាំ២០២១ ឃាត់ខ្លួនបានជនសង្ស័យម្នាក់ឈ្មោះ នួន ហួរ ហៅអាយក្ស ភេទប្រុស អាយុ២០ឆ្នាំ នៅចំណុចភូមិបាលិលេយ្យ១ សង្កាត់/ក្រុងប៉ោយប៉ែត ខេត្តបន្ទាយមានជ័យហើយបានសួរនាំរកម៉ូតូ ជនសង្ស័យបានបង្ហាញទីតាំងដែលពួកគេលាក់ទុក គឺនៅក្នុងបន្ទប់ជួលមួយកន្លែង ស្ថិតក្នុងភូមិបាលិលេយ្យ១ ហើយកម្លាំងអាវុធហត្ថក្រុងប៉ោយប៉ែត បានធ្វើការដកហូតយកម៉ូតូ និងនាំខ្លួនជនសង្ស័យមកកាន់មូលដ្ឋានកងរាជអាវុធហត្ថក្រុងប៉ោយប៉ែតដើម្បីធ្វើការសាកសួរតែម្ដង។

លោកវរៈសេនីយ៍ត្រី នួន នីណារ៉ូ មេបញ្ជាការ មូលដ្ឋានកងរាជអាវុធហត្ថក្រុងប៉ោយប៉ែត បានឱ្យដឹងថា តាមចម្លើយសារភាពរបស់ជនសង្ស័យបានឆ្លើយសារភាពថា រូបគេមានគ្នា០២នាក់ ម្នាក់នោះឈ្មោះ ហៀង (យ៉ន រតនា) ហើយនៅវេលាម៉ោង១៩ និង០០នាទី ថ្ងៃទី២១ខែមករាឆ្នាំ២០២១ ពួកគេក៌បាននាំគ្នាជិៈម៉ូតូម៉ាកវេវដើរលេង ពេលមកដល់ចំណុចកែងការ៉ាស់សាំង ភូមិមិត្តភាព សង្កាត់/ក្រុងប៉ោយប៉ែតខេត្តបន្ទាយមានជ័យ ក៌ឃើញក្មេងប្រុស០២នាក់ កំពុងបណ្ដើរម៉ូតូដោយម៉ូតូរបស់ពួកគេអស់សាំង ពេលនោះឈ្មោះ ហៀង ចុះទៅជួយបណ្ដើរម៉ូតូក្មេងនោះទៅចាក់សាំង ពេលចាក់សាំងរួច ឈ្មោះ ហៀង ក៌បានជិៈម៉ូតូរបស់ជនរងគ្រោះទៅចោលជនរងគ្រោះ ហើយយកទៅលាក់ទុកនៅចំណុចដែលសមត្ថកិច្ចបានដកហូតខាងលើ ហើយពួកខ្លួនគេក៌គេចខ្លួនតែម្ដង។

ដោយផ្អែកលើចម្លើយ និងមានវត្ថុតាងផងនោះ ជនសង្ស័យត្រូវបានកម្លាំងជំនាញអាវុធហត្ថក្រុងប៉ោយប៉ែតកសាងសំណុំរឿងបញ្ជូនមកបញ្ជាការដ្ឋាន អ.ហ ខេត្តចាត់ការបន្ត ចំណែកម៉ូតូម៉ាកស្យូម័រអ៊ិចដែលជារបស់ក្មេងប្រុស០២នាក់នោះដែលសមត្ថកិច្ចដកហូតពីជនសង្ស័យ ត្រូវបានប្រគល់ឱ្យម្ដាយជនរងគ្រោះវិញហើយ។

បច្ចុប្បន្ន ជនសង្ស័យឈ្មោះ នួន ហួរ ហៅ អាយក្ស និងម៉ូតូម៉ាកវេវ ដែលជិៈធ្វើសក្មភាព ត្រូវបានកម្លាំងជំនាញបទល្មើសព្រហ្មទណ្ឌអាវុធហត្ថខេត្តបន្ទាយមានជ័យ បញ្ជូនទៅសាលាដំបូងខេត្តហើយ ចំណែកបក្សពួកឈ្មោះ ហៀង កម្លាំងមូលដ្ឋានកងរាជអាវុធហត្ថក្រុងប៉ោយប៉ែត កំពុងស្រាវជ្រាវចាប់ខ្លួនបន្ត។