ប្រជាពលរដ្ឋចំនួន ២៧៥ គ្រួសារនៅក្នុងឃុំរហាត់ទឹក ស្រុកមង្គលបូរី ខេត្តបន្ទាយមានជ័យ ដែលរងគ្រោះដោយសាតែទឹកជំនន់នោះ នាថ្ងៃទី១៤ ខែតុលា ឆ្នាំ២០២០នេះ បានទទួលស្បៀងសង្គ្រោះបន្ទាន់ពីលោកស្រី កែ សួនសុភី សសុខា ប្រធានក្លិបបាល់ទាត់វិសាខា តាមរយៈក្រុមការងារសហភាពសហព័ន្ធយុវជនកម្ពុជាខេត្តបន្ទាយមានជ័យ។

ការនាំយកអំណោយសង្គ្រោះបន្ទាន់ចែកជូនពលរដ្ឋនេះធ្វេីឡេីងក្រោមអធិបតីភាពលោក អ៊ុ រាត្រី អភិបាលខេត្តបន្ទាយមានជ័យ ដោយលោកបានអំណរគុណដល់លោកស្រី កែ សួនសុភី សសុខា ដែលបានចូលរួមចំណែកជួយសង្គ្រោះដល់ប្រជាពលរដ្ឋដែលកំពុងតែរងគ្រោះ ដោយសារតែទឹកជំនន់នាពេលថ្មីៗនេះ។

លោកអភិបាលខេត្តបានលេីកឡេីងថា ដោយសារក្នុងរយៈពេលប៉ុន្មានថ្ងៃមកនេះស្ថានភាពទឹកបានហក់ឡេីង ធ្វេីឲ្យស្ទឹងមង្គលបូរី និងស្ទឹងសិរីសោភ័ណ ស្ថានភាពទឹកមានការកើនឡើងគួរឲ្យមានការព្រួយបារម្ភ។ តែទោះជាយ៉ាងណា ក្នុងនាមអាជ្ញាធរ លោកមិនទុកឲ្យប្រជាពលរដ្ឋរងគ្រោះឡេីយ អាជ្ញាធរកំពុងខិតខំជម្លៀសពលរដ្ឋរងគ្រោះទៅកាន់ទីទួលសុវត្ថិភាព ហេីយបើពលរដ្ឋជួបប្រទះបញ្ហាស្បៀងសូមទាក់ទងទៅអាជ្ញាធរ ដេីម្បីដោះស្រាយឲ្យបានទាន់ពេលវេលា។

ជាមួយគ្នានោះ លោកអភិបាលខេត្តក៏បានណែនាំដល់ប្រជាពលរដ្ឋ ត្រូវចូលរួមថែរក្សាសុខភាពឲ្យបានល្អ តាមរយៈការហូបស្អាត ផឹកស្អាត រស់នៅស្អាត ប្រកបដោយអនាម័យខ្ពស់ ពិសេមិនត្រូវបណ្តែតបណ្តាលកូនចៅតូចៗឲ្យលេងទឹកឡេីយ ក្រែងកេីតមានករណីជាយថាហេតុណាមួយកេីតឡេីង។ ត្រូវប្រុងប្រយ័ត្នជានិច្ចចំពោះអសិរពិស បេីមានករណីសត្វទិច ឬខាំត្រូវប្រញាប់រុសរាន់ទៅកាន់មន្ទីរពេទ្យ ឬមណ្ឌលសុខភាពដែលជិត ដោយមិនត្រូវធ្វេីការព្យាបាលដោយខ្លួនឯងឡេីយ ព្រោះអាចប្រឈមនឹងគ្រោះថ្នាក់។

សូមបញ្ជាក់ថា អំណោយសង្គ្រោះបន្ទាន់ដែលបានយកទៅចែកជូនដល់ពលរដ្ឋទាំង ២៧៥ គ្រួសារ ក្នុងមួយគ្រួសារទទួលបាន៖ អង្ករ ២៥ គីឡូក្រាម ទឹកផ្លែឈើ ១ កេស ទឹកបរិសុទ្ធវីតាល់ ១ កេស មី ១ កេស ទឹកត្រី ១ យួរ ទឹកស៊ីអ៉ីវ ១ យួរ និងត្រីខ ១២ កំប៉ុង៕