(ភ្នំពេញ)៖ បុគ្គលិកប្រមូលសំរាមរបស់ក្រុមហ៊ុន ស៉ីនទ្រី ជាង៣០០នាក់ នៅព្រឹកថ្ងៃទី១០ ខែតុលា ឆ្នាំ២០២០នេះបានចូលបម្រើការងារឡើងវិញ ដោយបែកចែកទៅតាមខណ្ឌទាំង១៤ ក្នុងរាជធានីភ្នំពេញ។

បុគ្គលិកប្រមូលសំរាមដែលជាអ្នកបោសសំអាតលើដងផ្លូវ និងអនាម័យខាងអូសរទេះ ទាំងជាង៣០០នាក់នេះ នៅព្រឹកថ្ងៃទី១០ ខែតុលានេះ បានមកជួបជុំគ្នានៅវិទ្យាស្ថានជាតិអប់រំ ជិតវិមានឯករាជ្យ ដោយមានការចូលរួមសំណេះសំណាលពីលោក ឃួង ស្រេង អភិបាលរាជធានីភ្នំពេញផងដែរ។

សូមជម្រាបថា ក្រុមប្រឹក្សាអាជ្ញាកណ្ដាល នៅថ្ងៃទី០៩ ខែតុលា ឆ្នាំ២០២០ម្សិលមិញ បានចេញលិខិតបញ្ជាឲ្យកម្មករនិយោជិតក្រុមហ៊ុន ស៉ីនទ្រី ផ្អាកការធ្វើកូដកម្មជាបន្ទាន់ រហូតដល់នីតិវិធីនៃអាជ្ញាកណ្ដាលត្រូវបញ្ចប់សព្វគ្រប់តាមផ្លូវច្បាប់។

លិខិតដដែលនោះ ក្រុមប្រឹក្សាអាជ្ញាកណ្ដាល បានបញ្ជាឲ្យកម្មករក្រុមហ៊ុន ស៉ីនទ្រី ត្រូវចូលធ្វើការងារវិញ ចាប់ពីរសៀលថ្ងៃទី១០ ខែតុលា ឆ្នាំ២០២០នេះ តាមវេនរៀងៗខ្លួន៕