នៅព្រឹកថ្ងៃព្រហស្បតិ៍ ៣កើត ខែភទ្របទ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី០៩ ខែកញ្ញា ឆ្នាំ២០២១ នៅក្នុងបរិវេណស្នងការដ្ឋាននគរបាលខេត្ត លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាល ខេត្តបាត់ដំបង អញ្ជើញជាគណៈធិបតី ក្នុងពិធីប្រកាសផ្ទេរភារកិច្ចចូលបំពេញភារកិច្ចថ្មីរបស់លោកស្នងការរង ចំនួន០៣រូប នាយការិយាល័យជំនាញចំនួន០២រូប និងនាយរងការិយាល័យចំនួន០១រូប និងដឹកនាំការប្រជុំបូកសរុបលទ្ធផលការងាររក្សាសន្តិសុខ សណ្តាប់ធ្នាប់សង្គម រយៈពេល៩ខែ ឆ្នាំ២០២១ និងលេីកទិសដៅការងារបន្តសម្រាប់អនុវត្ត ខែបន្ទាប់។

ក្នុងពិធីប្រជុំនេះមានការចូលរួមពី លោក លោកស្រី ឧត្តមសេនីយ៍ វរសេនីយ៍ ស្នងការរង អនុប្រធានផែនជំនាញ លោកនាយការិយាល័យជំនាញ មេបញ្ជាការវរសេនាតូចនគរបាលការពារព្រំដែនគោកទាំង០៤ និងលោកអធិការនគរបាលក្រុង-ស្រុក ទាំង ១៤ ។

ក្នុងកិច្ចប្រជុំលោកឧត្តមសេនីយ៍ស្នងការ បានធ្វើការណែនាំដល់អង្គភាពជំនាញ រៀបចំសណ្តាប់ធ្នាប់ក្នុងក្រុងបាត់ដំបង, រិតបន្តឹងច្បាប់ចរាចរណ៍ផ្លូវគោក, ករណីល្មើសច្បាប់ល្បែងស៊ីសង, គ្រឿងញៀន និងការនាំមនុស្សឆ្លងដែនខុសច្បាប់ ផងដែរ៕