កំពង់ឆ្នាំង៖ នៅព្រឹកថ្ងៃទី១៦ ខែធ្នូ ឆ្នាំ ២០២១ នេះបុគ្គលឈ្មោះ ម៉ៅ មន ត្រូវបាន កម្លាំងសមត្ថកិច្ចនៃមន្ទីរបរិស្ថានខេត្តកំពង់ឆ្នាំង នាំខ្លួនទៅបង្ហាញខ្លួន នៅអយ្យការអមសាលាដំបូង ខេត្តកំពង់ឆ្នាំង តាមដីកាបញ្ជាឲ្យចូលខ្លួន របស់តំណាងអយ្យការអមសាលាខេត្ត ។

តាមប្រភពបានឲ្យដឹងទៀតថា បុគ្គលឈ្មោះ ម៉ៅ មន ភេទប្រុស អាយុ ៤៩ឆ្នាំ ស្ថិតនៅភូមិទឹកចេញ ឃុំអមលាំង ស្រុកថ្ពង ខេត្តកំពង់ស្ពឺ ។ បុគ្គល ឈ្មោះ ម៉ៅ មន នេះ ជាប់ពាក់ព័ន្ធករណីកាប់គាស់រុករានដីព្រៃ ឆ្ការដុត និងឈូសឆាយដីព្រៃ ដើម្បីយកដីធ្វើជាកម្មសិទ្ធិប្រព្រឹត្តនៅចំណុចព្រៃអាត ព្រៃស្អំ លេខនិយាម X ៤១៩៩១០ Y ១៣២១០៦០ ស្ថិតភូមិខ្វិតទួលឃ្លាំង ឃុំក្បាលទឹក ស្រុកទឹកផុស ក្នុងដែនជម្រកសត្វព្រៃភ្នំឱរ៉ាល់ ភូមិសាស្ត្រខេត្តកំពង់ឆ្នាំង កាលពីថ្ងៃទី ២៣ ខែកញ្ញា ឆ្នាំ ២០២១បានធ្វើសកម្មភាពប្រើប្រាស់ត្រាក់ទ័រឈូសឆាយដីព្រៃក្នុងដែនជម្រកសត្វព្រៃឧរ៉ាល់អស់ទំហំ ៣ ហិកតា ៥៨៣ ។