នាព្រឹកទី២១ ខែមករា ឆ្នាំ២០២១ លោក ណុប ដារ៉ា អភិបាលរង នៃគណ:អភិបាលខេត្តបាត់ដំបង បានអញ្ចើញចុះដោះស្រាយបញ្ចប់វិវាទរវាងអ្នកម៉ៅការសាងសង់ផ្សារ និងអាជីវករ ផ្សារល្វាចាស់ ស្ថិតក្នុងឃុំល្វា ស្រុកបវេល ខេត្តបាត់ដំបង ដោយទទួលជោគជ័យតាមគោលនយោបាយ ឈ្នះ ឈ្នះ សម្ដេចតេជោ ហ៊ុន សែន ។

សូមបញ្ជាក់ថា ផ្សារល្វាចាស់បានកើតវិវាទ រវាងអ្នកសាងសង់ផ្សា និងអាជីវករ ដែលបណ្ដាលអោយមានការកកស្ទះនូវការអភិវឌ្ឍផ្សារនេះឲ្យមានការរីកចម្រើន និងមានសណ្ដាប់ធ្នាប់ដូចបណ្ដាលផ្សារដទៃទៀតក្រោយពីទទួលបានព័ត៌មាននៃការវិវាទរវាងអ្នកសាងសង់ផ្សារនិងអាជីវក ឯកឧត្តម ងួន រតនៈ អភិបាលនៃគណៈអភិបាលខេត្តបាត់ដំបង បានចាត់តាំងឲ្យ លោកណុប ដារ៉ា អភិបាលរងខេត្តបាត់ដំបង ចុះទៅដល់ទីតាំងផ្ទាល់ដើម្បីធ្វើការដោះស្រាយបញ្ហានេះជូនប្រជាពលរដ្ឋ ជាលទ្ធផលនៃដំណោះស្រាយ ១.អាជីវករព្រមទទួលយកនូវការសាងសង់តូបថ្មីរបស់ខ្លួនតាមតម្លៃទីផ្សារក្នុង ១តូប ៥៥០ដុល្លារ តែដោយឃើញផលវិបាករបស់អាជីវករ លោកណុប ដារ៉ា បានធ្វើការសម្របសម្រួលជាមួយអ្នកសាងសង់ដោយបញ្ចុះតម្លៃក្នុង១តូបតែ ៤៨៣ដុល្លា ២.អាជីវករបានឯកភាពគ្នាជ្រើសរើសចាប់លេខតូបលក់ដូរដោយខ្លូនឯង ។

ក្រោយបានដោះស្រាយបញ្ចប់បញ្ហា លោកណុប ដារ៉ា បានសំណូមពរឲ្យអាជីវករដែលលក់ដូរតាមតូបថ្មីត្រូវរក្សាបាននូវសណ្ដាប់ធ្នាប់ល្អ អនាម័យល្អ ចេះសាមគ្គីឯកភាពគ្នា នឹងត្រូវជឿទុកចិត្តលើការដឹកនាំរបស់ប្រមុខរដ្ឋាភិបាល សូមកុំជឿតាមការញុះញង់អុចអាលបំប៉ោងរបស់ជនអគតិមួយចំនួនដែលមានបំណងអាក្រក់ចង់បំបែកបំបាក់សាមគ្គីឯកភាពផ្ទៃក្នុងរបស់កម្ពុជា ។

អាជីវករផ្សារល្វាចាស់ទាំងអស់មានចិត្តសប្បាយរីករាយត្រេកអរឥតឧបមា និងសូមថ្លែងអំណរគុណដល់ថ្នាក់ដឹកនាំគ្រប់លំដាប់ថ្នាក់ជាពិសេស គឺលោកណុប ដារ៉ា ដែលបានលះបង់ពេលវេលាដ៏មានតម្លៃចុះជួបសំណេះសំណាល និងជួយដោះស្រាយបញ្ជាប់វិវាទនេះដោយជោគជ័យ នឹងសូមគោរពជូនពរលោកណុប ដារ៉ាព្រមទាំងក្រុមការងារទាំងអស់ជួបប្រទះតែសេចក្កីសុខ សេចក្កីចម្រើន មានសុខភាពល្អ ជាពិសេសគឺសម្រេចបានរាល់ភារកិច្ចដែលថ្នាក់ដឹកនាំបានប្រគល់ជូនដោយជោគជ័យ៕