ខេត្តស្វាយរៀង ៖ រថយន្តធុនយក្សដឹកដែកអេតចាយកំពុងតាមផ្លូវជាច្រើនខ្សែក្នុងស្រុកស្វាយជ្រំឆ្ពោះមកកាន់ច្រករបៀងតានូ និងច្រករបៀងគ្រួសជាប់ព្រំដែនវៀតណាមនោះកំពុងតែត្រូវបានបំផ្លាញបណ្តាលខូចបណ្តើរៗហើយដែលមានក្រឡុកធំៗ ខណៈដែលមានរថយន្តធុនយក្សដឹកដែកអេតចាយទាំងអស់ជាច្រើនគ្រឿងក្នុងមួយថ្ងៃៗ (ពោលគឺដឹកទាំងថ្ងៃទាំងយប់នោះ) ចាប់តាំងពីមុនសែនចូលឆ្នាំចិន ហើយគឺបានសម្រាកដឹកតែ២-៣ថ្ងៃប៉ុណ្ណោះដែលជាថ្ងៃសែន និងបន្តដឹករហូតមកដល់ថ្ងៃទី១៥ ខែកុម្ភៈឆ្នាំ២០១៩នេះសង្ស័យត្រូវរ៉ូវជាមួយសមត្ថកិច្ចជំនាញណាមួយអស់ហើយមើលទៅទើបក្រុមក្បួនរថយន្តដឹកអេតចាយទាំងនេះដឹកបានយ៉ាងរលួនគ្មានអ្នកឃាត់បែបនេះ។

ប្រជាពលរដ្ឋរស់នៅតំបន់នោះបានប្រាប់ក្រុមអ្នកសារព័ត៌មានយើងឲ្យដឹងថា នាកន្លងមកផ្លូវដែលមកកាន់ច្រករបៀងទាំង២មានភាពល្អប្រសើរដែលងាយស្រួលក្នុងការធ្វើដំណើរទាំងដឹកកសិផលមកកាន់ទីផ្សារ ប៉ុន្តែមួយរយៈនេះសង្កេតឃើញមានក្បួនរថយន្តធុនយក្សដឹកដែកអេតចាយសម្រុកទាំងយប់ទាំងថ្ងៃមិនខ្វល់ពីការខូចផ្លូវស្អីនោះឡើយសំខាន់ឲ្យតែបានដឹកទៅប្រសើរហើយ។

ក្នុងឆ្នាំ២០១៨កន្លងមកនេះលោក ម៉ែន វិបុល អភិបាលខេត្តស្វាយរៀងបានដាក់បទបញ្ជាមន្ត្រីជំនាញទប់ស្កាត់រាល់រថយន្តដឹកលើសទម្ងន់ គ្រប់ប្រភេទដែលបង្កឲ្យខូចផ្លូវជាតិ និងផ្លូវលំផ្សេងៗ ផ្លូវដី ផ្លូវក្រាលខ្សាច់ និងទប់ស្តាត់កុំឲ្យមានរថយន្តធុនធំដឹកតាមផ្លូវអស់ទាំងនេះ។ ក៏ប៉ុន្តែការជួសជុលរបស់អាជ្ញាធរមិនទាន់បានរួចរាល់ផង ក្រុមឈ្មួញនៅតែដឹកអេតចាយតាមរថយន្តយក្សមកកាន់ព្រំដែនច្រករបៀងតានូ និងច្រកគ្រួសដដែលប្រហែលមានមនមន្ត្រីខិលខូចមួយចំនួនបើកដៃឲ្យឈ្មួញប្រើប្រាស់រថយន្តធុនយក្សដឹកអេតចាយ បំផ្លាញផ្លូវបន្តទៀត។ ដូច្នេះសូមអំពាវនាវលោកអភិបាលខេត្តមេត្តាជួយអន្តរាគមន៍ករណីរឿងនេះផង។

ពលរដ្ឋរស់នៅតំបន់នោះសំណូមពរដល់ស្ថាប័នជំនាញទាំងអស់ដែលមានការពាក់ព័ន្ធមេត្តាជួយចុះមកមើលផ្លូវមួយនេះផង បើមិនដូច្នេះទេផ្លូវមកកាន់ច្រករបៀងតានូ និងគ្រួស (ក្រសាំងជ្រំ) នេះប្រាកដជារងខូចខាតទាំងស្រុងមិនខានទេ។ ទន្ទឹមនោះពលរដ្ឋលើកឡើងទៀតថា បើគ្មានការទប់ស្តាត់នោះទេ កុំថាឡើយជិះម៉ូតូសូម្បីតែជិះកង់មិនរួចផងបាទ ព្រោះកន្លងមកធ្លាប់ជិះកាត់ភក់ល្បាប់ និងក្រឡុកធំៗរួចមកហើយ។ ហើយពលរដ្ឋខាងឆ្ងល់ថា នៅខាងលិចផ្សារស្វាយជ្រំមានដាក់កន្លែងត្រួតពិនិត្យរថយន្តលើសទម្ងន់ និងដឹកខុសបច្ចេកទេសដែរ តែនៅមានការដឹកដដែលសង្ស័យមានអី?៕