(ភ្នំពេញ)៖ឧត្តមសេនីយ៍ឯក ហ៊ុន ម៉ាណែត៖ ការប្រឡងជ្រើសរើសនាយទាហានឆ្នាំ២០២០នេះ ត្រឹមត្រូវ មានតម្លាភាព «អ្នកចេះគឺជាប់»
ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង កងយោធពលខេមរភូមិន្ទ មេបញ្ជាការកងទ័ពជើងគោក និងជាប្រធានអនុគណៈកម្មការប្រឡង បានប្រកាសថា ការប្រឡងជ្រើសរើសនាយទាហាន នៃកងយោធពលខេមរភូមិន្ទ សម្រាប់ឆ្នាំ២០២០នេះ គឺធ្វើឡើងដោយភាពត្រឹមត្រូវ តម្លាភាព គ្មានការសូកប៉ាន់ ឬរត់ការដើម្បីថ្នូរនឹងការជាប់នោះទេ ពោលមានន័យថា «អ្នកចេះ គឺជាប់»។
ការប្រកាសបែបនេះ របស់ឧត្តមសេនីយ៍ឯក ហ៊ុន ម៉ាណែត បានធ្វើឡើងក្នុងឱកាសដែលលោកអញ្ជើញជាអធិបតីភាព ក្នុងពិធីប្រឡងជ្រើសរើសនាយទាហាន នៃកងយោធពលខេមរភូមិន្ទ និងកាត់វិញ្ញាសារ នៅវិទ្យាល័យបាក់ទូក រាជធានីភ្នំពេញ នៅព្រឹកថ្ងៃទី២២ ខែធ្នូ ឆ្នាំ២០១៩នេះ។
ឧត្តមសេនីយ៍ឯក ហ៊ុន ម៉ាណែត បានថ្លែងថា មានបេក្ខជនបានដាក់ពាក្យប្រឡងនាយទាហាន នៃកងយោធពលខេមរភូមិន្ទ ជាង៨,០០០នាក់ ប៉ុន្តែជ្រើសរើសយកចំនួន ៦២០នាក់។ លោកឧត្តមសេនីយ៍ ក៏បានថ្លែងអរគុណដល់យុវជន និងយុវតី ដែលបានដាក់ពាក្យប្រឡងចូលនាយទាហាន ដើម្បីបម្រើជាតិមាតុភូមិ។
លោកបានបញ្ជាក់ថា កុំជឿជនឱកាសនិយមណាម្នាក់ ដែលបានអះអាងថា សិស្សអាចសូកប៉ាន់ដើម្បីជាប់ឱ្យសោះ «សូមប្រយ័ត្នចាញ់បោកគេ» (ពួកស៊ីឡាក់)។
លោកបានធ្វើការផ្ដាំផ្ញើដល់បេក្ខជន-បេក្ខនារី ធ្វើយ៉ាងណាប្រឹងប្រែងខិតខំយកចិត្តទុកដាក់ក្នុងការប្រឡងសំណេរ នឹងបន្តប្រឡងវិញ្ញាសារកាយសម្បទាឱ្យទទួលបានជោគជ័យ។
លោកឧត្តមសេនីយ៍ឯក ហ៊ុន ម៉ាណែត ក៏បានក្រើនរំលឹកដល់បេក្ខជនទាំងអស់ឱ្យខិតធ្វើកិច្ចប្រឡងរបស់ខ្លួន ឱ្យអស់ពីសមត្ថភាព ជាពិសេសត្រូវធ្វើបានគ្រប់មុខវិជ្ជា តាមវិញ្ញាសារ ដែលត្រូវបានដាក់ឱ្យប្រឡង បន្ថែមពីនេះបេក្ខជនទាំងអស់ មិនត្រូវធ្វើឱ្យខុសតាមបទបញ្ជាផ្ទៃក្នុង របស់គណៈកម្មការដែលបានចែងនោះឡើយ។
សម្រាប់វិញ្ញាសារកាយសម្បទានឹងរៀបចំធ្វើឡើងចាប់ពីថ្ងៃទី២៣ ដល់ថ្ងៃទី២៦ ខែធ្នូ ឆ្នាំ២០១៩ នៅស្ដាតចាស់ ក្បែររង្វង់មូលស្ពានជ្រោយចង្វារ។
គួរជម្រាបថា ការប្រឡងជ្រេីសរេីសទាហានលេីកនេះ មានបេក្ខជន បេក្ខនារី បានដាក់ពាក្យប្រឡងទូទាំងប្រទេសសរុប ចំនួន៨,០៦៣នាក់ (ប្រុស៤,៦៧០នាក់/ ស្រី៣,៣៣នាក់) ស្មើនឹង ៣២៧បន្ទប់ បើប្រៀបធៀបនឹងឆ្នាំ២០១៩កន្លងទៅ មានបេក្ខជនបានដាក់ពាក្យប្រឡងសរុបចំនួន ៨,៣៥២នាក់ គឺថយចំនួន ២៨នាក់ ស្មើនឹង ៣,៤៦%។
ការប្រឡងរបស់បេក្ខជន និងបេក្ខនារីប្រព្រឹត្តទៅតាមមណ្ឌល ដែលគេបានដាក់ពាក្យប្រឡង ក្នុងនោះរួមមាន៖ រាជធានីភ្នំពេញ នៅវិទ្យាល័យបាក់ទូក, នៅយោធភូមិភាគទី១ នៅវិទ្យាល័យហ៊ុនសែន ស្ទឹងត្រែង, នៅយោធភូមិភាគទី២ នៅមជ្ឈមណ្ឌលគរុកោសល្យភូមិភាគកំពង់ចាម, នៅយោធភូមិភាគទី៣ នៅវិទ្យាល័យជាស៊ីមតាកែវ, នៅយោធភូមិភាគទី៤ នៅវិទ្យាល័យអង្គរខេត្តសៀមរាប និងនៅយោធភូមិភាគទី៥ នៅវិទ្យាល័យព្រះមុនីវង្ស ខេត្តបាត់ដំបង៕