អ្នកនាំពាក្យរដ្ឋាភិបាលលោក ផៃ ស៊ីផានបានចាត់ទុកថាការគំរាមរបស់លោកសម រង្ស៉ីគឺជារឿងយកពលរដ្ឋកម្ពុជាមកដាក់សម្ពាធលើសម្តេចនាយករដ្ឋមន្ត្រី ហ៊ុន សែន ដើម្បីចរចារដែលជារឿងមិនចាប់អារម្មណ៍នោះទេ។ក្រោយពេលដែលមេដឹកនាំក្រុមជំទាស់គឺលោក សម រង្ស៉ីព្រមានថានឹងនាំពលរដ្ឋ កម្ពុជាងើបឈរឡើងដើម្បីតតាំងជាមួយនឹងសម្តេចនាយករដ្ឋមន្ត្រីហ៊ុន សែន នៅ ពេលសម្តេចចូលមកកាន់ប្រទេសកម្ពុជានាពេលខាងមុខនោះ មិនបានធ្វើឲ្យមន្ត្រី រដ្ឋាភិបាលយកចិត្តទុកដាក់នោះទេ ដោយថែមទាំងចាត់ទុកថានេះគឺជាការគំរាមរកការចរចារដែលមិនអាចទៅរួច។លោក ផៃ ស៊ីផាន អ្នកនាំពាក្យរដ្ឋាភិបាលបានប្រាប់វិទ្យុបរទេសថាការគំរាមរបស់លោកសម រង្ស៉ី គឺជារឿងយកពលរដ្ឋកម្ពុជាមកដាក់សម្ពាធលើសម្តេចនាយករដ្ឋមន្ត្រី ហ៊ុន សែន ដើម្បីចរចារដែលជារឿងមិនចាប់អារម្មណ៍នោះទេ។«អាស្រ័យដូច្នេះ សម រង្ស៉ី ត្រូវប្រឌិតសាច់រឿងឲ្យបានច្រើនដើម្បីយកគំនាប សម្ពាធ របស់ប្រជាពលរដ្ឋដើម្បីទៅតទល់នឹងនាយករដ្ឋមន្ត្រីដែលកើតឡើងចេញពីការបោះឆ្នោត។ចំណុចទី២ ប្រជាពលរដ្ឋនៅក្នុងស្រុកហាក់បីដូចជាលែងចាប់អារម្មណ៍នឹងការលើកឡើងរបស់គាត់ ទោះជាគាត់ខំប្រឹងភូតភរដើម្បីឲ្យមានសេចក្តីសង្ឃឹមតតាំង ទៅមុខទៀតដូចជាមិនមានទេ។ ភាគច្រើននោះ សូម្បីតែនៅខាងក្រៅយើងឃើញថា ពលរដ្ឋភាគតិចណាស់ដែលទៅគាំទ្រគាត់»។លោក ផៃ ស៊ីផាន បាននិយាយយោងទៅលើមហាបាតុកម្មនៅញូវយ៉កដែលលោក សម រង្ស៉ីមិនអាចប្រមូលមនុស្សច្រើនបាន ការបាក់បែកផ្ទៃក្នុងគណបក្សសង្គ្រោះជាតិ ហើយនឹងរូបភាពនយោបាយដែលបាត់បង់ជំនឿគាំទ្រ។លោកសង្កត់ធ្ងន់ថាការចរចាជាមួយលោក សម រង្ស៉ីទំនងជាមិនកើតមានទេ ដោយលោកបានដកស្រង់អត្ថាធិប្បាយរបស់សម្តេចនាយករដ្ឋមន្ត្រីហ៊ុន សែន មកបញ្ជាក់ទាក់ទងនឹងការស្បថកាត់ដៃបើសម្តេចស្នើឲ្យមានការលើកលែងទោសដល់លោក សម រង្ស៉ី។មេដឹកនាំក្រុមជំទាស់គឺលោក សម រង្ស៉ី ដែលទើបបានទទួលតំណែងជាប្រធានស្តីទី គណបក្សសង្គ្រោះជាតិដ៏ច្របូកច្របល់នោះ បានថ្លែងប្រាប់ក្រុមអ្នកគាំទ្ររបស់លោក និងប្រាប់វិទ្យុបរទេសក្នុងទីក្រុងប៉ារីសប្រទេសបារាំងថា លោកនឹងចាប់ផ្តើមធ្វើឲ្យមានការផ្លាស់ប្តូរនៅឆ្នាំ២០១៩ នៅពេលលោកដាក់គម្រោងការចូលទៅកាន់ប្រទេសកម្ពុជាវិញ ទោះជាជាប់ក្តីក្តាំនៅតុលាការដែលអាចឲ្យលោកត្រូវជាប់គុកក្តី។«ខ្ញុំចង់អញ្ជើញបងប្អូនប្រជាពលរដ្ឋខ្មែរ អ្នកដែលនៅប្រទេសជិតខាង។ យើងនឹងជួបជុំគ្នាហើយយើងនឹងដើរចូលប្រទេសកម្ពុជាឲ្យបានមនុស្ស១លាននាក់។ ហ៊ុន សែន ធ្វើអីយើងអត់បានទេដូចជាសមុទ្រយក្សស៊ូណាម៊ីអីចឹង។ បើប្រជាពលរដ្ឋ១លាននាក់បុកសម្រុកទៅទីក្រុងភ្នំពេញខ្ញុំជឿថាប្រជារាស្ត្រនឹងងើបឈរទាំងអស់គ្នា មិនមែន១លាននាក់ទេ ទាំងអស់គ្នា១៥លាននាក់ យើងនឹងងើបឈរទាំងអស់គ្នាដើម្បីនាំមកនូវការផ្លាស់ប្តូរដូចដែលប្រជារាស្ត្រខ្មែរចង់បានយូរហើយ»។អត្ថាធិប្បាយរបស់លោកសម រង្ស៉ី ហាក់ដូចជាគ្មានប្រតិកម្មខ្លាំងពីមន្ត្រី និងមេដឹកនាំ រដ្ឋាភិបាល ដែលធ្លាប់បានព្រមានចាត់វិធានការយោធាបង្ក្រាបការបះបោរផ្តួលរំលំ រដ្ឋាភិបាលកាលពីកន្លងមកទេ ក្នុងពេលដែលគេឃើញថារដ្ឋាភិបាលគណបក្សកាន់ អំណាចហាក់ដូចជាបន្ទន់ជំហរខ្លះដើម្បីធ្វើវិសោធនកម្មច្បាប់សម្រាប់បើកផ្លូវឲ្យក្រុមឥស្សរជននយោបាយគណបក្សជំទាស់ចំនួន១១៨ បានចូលរួមក្នុងឆាកនយោបាយ ឡើងវិញ។ពួកគេត្រូវតុលាការកំពូលសម្រេចរារាំង រយៈពេល៥ឆ្នាំមិនឲ្យមានសកម្ម ភាពនយោបាយ នៅពេលគណបក្សសង្គ្រោះជាតិត្រូវរំលាយ ហើយលោក កឹម សុខា ត្រូវចាប់ឃុំខ្លួនដោយការថ្លែងសារនយោបាយ ដែលអាជ្ញាធរកម្ពុជាចាត់ទុកថាជា សកម្មភាពប៉ុនប៉ងផ្តួលរំលំរដ្ឋាភិបាលសម្តេចនាយករដ្ឋមន្ត្រី ហ៊ុន សែន។លោកសម រង្ស៉ីជឿថាសហគមន៍អន្តរជាតិធ្វើការដាក់សម្ពាធកាន់តែខ្លាំងឡើងដើម្បី ឲ្យមានដំណោះស្រាយជារួម ៥ចំណុច តែមិនមែនជាបំណែកៗនោះទេ ទោះជា រដ្ឋាភិបាលប្រកាសថាមិនបារម្ភក្តី។«តាមកាណ៍ពិតនោះគេព្រួយបារម្ភណាស់ពីព្រោះជំហរអន្តរជាតិរឹងមាំគឺជំហរអន្តរជាតិ គេជំរុញឲ្យមានដំណោះស្រាយរួម ៥ចំណុចដើម្បីឲ្យប្រទេសកម្ពុជាបានស្គាល់នូវលទ្ធិប្រជាធិបតេយ្យឡើងវិញ។ ខ្ញុំសូមរំលឹកចំណុចទី១គឺឲ្យដោះលែងលោក កឹម សុខាជា បន្ទាន់និងដោយឥតលក្ខខណ្ឌ។ ចំណុចទី២ គឺឲ្យគណបក្សសង្គ្រោះជាតិដំណើរការ ឡើងវិញ។ ចំណុចទី៣ គឺឲ្យទម្លាក់ចោលរាល់ការចោទប្រកាន់មកលើមន្ត្រី មកលើថ្នាក់ ដឹកនាំគណបក្សសង្គ្រោះជាតិ ហើយមកលើ សកម្មជន សកម្មនារីគណបក្សសង្គ្រោះ ជាតិទាំងអស់។ចំណុចទី៤គឺប្រគល់តំណែង ជាពិសេសសមាជិកក្រុមប្រឹក្សាឃុំសង្គាត់ ៥០០៧ នាក់ តំណែងមេឃុំ ចៅសង្កាត់ ហើយសមាជិកសាមញ្ញក្រុមប្រឹក្សាឃុំសង្កាត់ត្រូវតែប្រគល់សងមក ឲ្យវិញ។ ហើយចំណុចទី៥ ត្រូវតែរៀបចំការបោះឆ្នោតឡើងវិញទាំងរដ្ឋសភា ទាំងព្រឹទ្ធសភា ការបោះឆ្នោតដែលមានការចូលរួមពីគណបក្សសង្គ្រោះជាតិ ហើយដោយមានការត្រួតពិនិត្យពីអន្តរជាតិ»។សហភាពអឺរ៉ុបនៅដើមខែតុលា បានជូនដំណឹងទៅរដ្ឋាភិបាលកម្ពុជាថា ប្រទេសកម្ពុជានឹងបាត់បង់ឋានៈអនុគ្រោះពន្ធសម្រាប់នាំ ទំនិញចូលទីផ្សាររបស់សហភាពអឺរ៉ុប ដោយសារតែការរំលោភសិទ្ធិមនុស្ស និងការ ធ្លាក់ចុះនៃលទ្ធិប្រជាធិបតេយ្យ។ សហភាពអឺរ៉ុបក៏បានទុកពេលឲ្យកម្ពុជារយៈពេល ១២ខែ ដើម្បីស្តារស្ថានភាពប្រជាធិបតេយ្យឡើងវិញ មុននឹងសម្រេចដកព័ន្ធអនុគ្រោះព័ន្ធដែលផ្ដល់ផលចំណេញដល់កម្ពុជាប្រមាណ ៧០០លានដុល្លារអាមេរិកក្នុងមួយឆ្នាំៗ។សហរដ្ឋអាមេរិកដែលកំពុងធ្វើច្បាប់ដាក់ទណ្ឌកម្មនានាលើមន្ត្រីរដ្ឋាភិបាលដែលពាក់ព័ន្ធនឹងការធ្វើឲ្យខូចប្រជាធិបតេយ្យនិងសិទ្ធិមនុស្ស ហើយសហភាពអឺរ៉ុបបានស្នើសុំឲ្យក្រុមអ្នកនយោបាយស្តារស្ថានការណ៍ឡើងវិញដើម្បីបញ្ចៀសទណ្ឌកម្ម៕
ចំនួនអ្នកទស្សនា
ព័ត៌មានគួរចាប់អារម្មណ៍
(បាត់ដំបង)៖ ក្រសួងសុខាភិបាល និងអង្គការសុខភាពពិភពលោក ក្នុងពេលបំពេញបេសកកម្ម នៅខេត្តបាត់ដំបង បានសម្តែងនូវការកោតសរសើរ ចំពោះការលះបង់ដ៏ធំធេងរបស់ក្រុមគ្រូពេទ្យ ..... (សហការីtnc)
ភ្នំពេញ ៖ តុលាការកាត់ទោសឧកញ៉ា សុខ ប៊ុន និងមន្ត្រីអាជ្ញាធរកោះរ៉ុង៥នាក់ ក្លែងឯកសាររំលោភយកដីរដ្....ឋ (សហការីTNC)
(ភ្នំពេញ)៖ បើកបរដោយការប្រុងប្រយត្ន័រក្សាជីវិតអ្នកនិងអ្នកដ៏ទៃ! ស្លាប់៧នាក់ និងរបួស៩នាក់ ក្នុងគ្រោះថ្នាក់ចរាចរណ៍ទូទាំងប្រទេសថ្ងៃទី២២ ខែមិថុនាម្សិលមិញ..... (សហការីTNC)
(ភ្នំពេញ)៖ រដ្ឋាភិបាលជប៉ុន ផ្តល់ជំនួយសង្គ្រោះបន្ទាន់ដល់កម្ពុជា ជាង៦លានដុល្លារ.,. (សហការីTNC)
ពេលនេះផ្លូវជាតិលេខ ១០ ថ្មី ពីសំឡូតមកកោះកុង ចាប់ផ្តើមចេញរូបរាងបណ្តើរៗ (សហការីTNC)
វីដែអូ