លោក ស៊ូ អារ៉ាហ្វាត់ អភិបាលរងខេត្តបាត់ដំបង ដែលមាននាទីក្នុងការរកដំណោះស្រាយរឿងវិវាទដីធ្លី ទិសស្រុកគាស់ក្រឡ និងលោក ទា គឹមហុង អតីតទីប្រឹក្សា ក្រសួងមហាផ្ទៃ កំពុងប្រឈមមុខនឹងផ្លូវច្បាប់ ជុំវិញករណី ឆបោក និងរំលោភលើសេចក្ដីទុកចិត្ត បន្ទាប់ពីត្រូវលោកឧកញ៉ាម្នាក់ ដាក់ពាក្យប្តឹងទៅតុលាការ។គួរបញ្ជាក់ដែរថា ជុំវិញករណីក្លែងឯកសារ ផ្ញើទៅកាន់ខុទ្ទកាល័យ សម្ដេច ស ខេង ដោយមានបំណងស៊ីដាច់ដីកម្មសិទ្ធិឯកជន ជិត២០០០ហិកតា រួមជាមួយនឹងទឹកប្រាក់ចំនួន២៥.០០០ដុល្លារផង ដែលលោកអភិបាលរងខេត្ត បានសន្យាថាយកសម្រាប់រត់ការធ្វើប្លង់រឹង ទៅលើដីដែលនៅសេសសល់ តែទីបំផុតគ្រាន់តែជាលេសតែប៉ុណ្ណោះ ដោយគ្មានបានលទ្ធផលអ្វីទាំងអស់។យោងតាមឯកសារដែលកម្ពុជាថ្មីទទួលបាន គឺ កន្លងមក លោកឧកញ៉ា សង ថន អាយុ៦៦ឆ្នាំ បច្ចុប្បន្នរស់នៅភូមិបែកចានថ្មី សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង បានប្រមែប្រមូលលុយកាក់ទិញយកដីពីមន្ត្រីយោធភូមិភាគ៥ ដែលបានពីរបបគោលនយោបាយ តំបន់អភិវឌ្ឍន៍ និងមន្ត្រីរាជការនានា សរុបចំនួន៥.១៤៤ហិកតា នៅក្នុងស្រុកគាស់ក្រឡ ខេត្តបាត់ដំបង ព្រមទាំងបានអាស្រ័យផល តាំងពីឆ្នាំ២០០០ មកម្ល៉េះ។ឯកសារបានបញ្ជាក់បន្ថែមថា ក្រោយមកក៏មានប្រជាពលរដ្ឋ និងគ្រួសារយោធាមួយចំនួន បានលបទៅទន្ទ្រានលើដីរបស់លោកអស់មួយចំនួន រហូតថ្នាក់ខេត្ត ក៏បានដាក់កម្លាំងជំនាញដើម្បីចុះដោះស្រាយវិវាទដីធ្លីនេះឡើង ប៉ុន្តែអ្វីៗក៏បានបញ្ចប់ដោយរលូន។សំខាន់ជាងនេះទៅទៀតនោះ គឺលោកឧកញ៉ា សង ថន ក៏បានរៀបចំគម្រោងប្រគល់ដីគម្របព្រៃឈើទៅឲ្យ សម្ដេច ស ខេង ចំនួន៧០០ហិកតា ដើម្បីប្រើប្រាស់ទៅតាមតម្រូវការ គឺនៅចំណុច ឃុំឆ្នាល់មាន់២០០ហិកតា និងចំណុចភ្នំស្ន ក្នុងឃុំព្រះផុស ចំនួន៥០០ហិកតា តាមរយៈលោកអភិបាលរងខេត្ត ស៊ូ អារ៉ាហ្វាត់ ដែលមាននាទីដោះស្រាយវិវាទដីធ្លីស្រាប់ និងជាថ្នូរក្នុងការសុំឲ្យជំនាញចេញប្លង់កាន់កាប់ស្របច្បាប់ទៅលើដីដែលនៅសល់ចំនួន៤.៤៤៤ហិកតា ហើយឯកសារប្រគល់ដីនេះ ក៏មានការចុះហត្ថលេខាទទួលស្គាល់ពីអតីត លោកអភិបាលស្រុក ផេង សិទ្ធី ផងដែរ កាលពីថ្ងៃទី៧ ខែកញ្ញា ឆ្នាំ២០១៦។ក្រោយពីបានទទួលលិខិតប្រគល់ដី ចំនួន៧០០ ហិកតា របស់លោកឧកញ៉ា សង ថន ទៅឲ្យសម្តេច ស ខេង រួចមក នៅថ្ងៃទី៨ ខែឧសភា ឆ្នាំ២០១៧ លោកអភិបាលខេត្តរង ស៊ូ អារ៉ាហ្វាត់ បានក្លែងឯកសារមួយច្បាប់ ដោយមានឡូហ្គូសាលាខេត្ត លេខ ៤៨១ / ១៧ សស ដោយបញ្ជាក់ថា បានទទួលដីពីលោកឧកញ៉ា សង ថន ចំនួន២៥០០ហិកតា លើផ្ទៃដីសរុប៥១៤៤ហិកតា ដែលមានទីតាំងក្នុងឃុំ ឆ្នាល់មាន់ ឃុំដូនបា និងឃុំព្រះផុស។នៅលើលិខិតក្លែងក្លាយនេះ លោកអភិបាលខេត្តរងបានបែងចែករួចជាស្រេច មុននឹងបញ្ជូនទៅសម្ដេច ស ខេង ដោយលោកបានរៀបរាប់ថា ដីដែលត្រូវបែងចែកទៅឲ្យប្រជាពលរដ្ឋ និងគ្រួសារយោធិន គឺ៣០០ហិកតា នៅចំណុចភ្នំស្ន ក្នុងភូមិតានួត ឃុំព្រះផុស និង ដី១៦៣ហិកតា នៅភូមិសំរោង ឃុំឆ្នាល់មាន់ គឺពួកគាត់កំពុងដាំដុះសព្វថ្ងៃ សរុបដីដែលត្រូវបែងចែកពួកគាត់មានចំនួន ៤៦៣ហិកតា ដោយឡែកដីដែលនៅសល់ពីការបែងចែក គឺមានចំនួន២០៣៧ហិកតា គឺត្រូវរក្សាទុក ២០០ហិកតា ធ្វើជាឧទ្យានធម្មជាតិ សម្ដេច ស ខេង និងរក្សាទុក២៥ហិកតា សម្រាប់បុណ្យរុក្ខទិវាដាំកូនឈើ ដូច្នេះសរុបដីដែលនៅសល់ គឺមានចំនួន១៨១២ហិកតា ស្នើសុំសម្ដេច ទុកជាដីត្រៀមបម្រុងរបស់រដ្ឋបាលខេត្តសម្រាប់ប្រើប្រាស់ជាប្រយោជន៍សាលាខេត្តបាត់ដំបង។បន្ទាប់ពីការក្លែងឯកសារត្រូវបានបញ្ចប់ លោក ស៊ូ អារ៉ាហ្វាត់ បានយកឯកសារនេះទៅឲ្យ លោក ច័ន្ទ សុផល អតីត អភិបាល នៃគណអភិបាលខេត្ត ចុះហត្ថលេខា ទើបបញ្ជូនទៅ សម្តេច ស ខេង ដោយមិនឲ្យ លោកឧកញ៉ា សង ថន ដឹងឡើយ។ជុំវិញការស្នើសុំពី លោក សង ថន ឲ្យ លោក ស៊ូ អារ៉ាហ្វាត់ ជួយសម្រួលរត់ការទៅកាន់មន្ទីរជំនាញ ដើម្បីស្នើសុំចេញប្លង់ កាន់កាប់ស្របច្បាប់ ( ប្លង់រឹង ) គឺលោក ស៊ូ អារ៉ាហ្វាត់ បានមកបើកយកលុយពីលោកឧកញ៉ា ចំនួន៧លើក ក្នុងនោះលើកទី១ ចំនួន៥.០០០ដុល្លារ លើកទី២ ចំនួន៤.០០០ដុល្លារ លើកទី៣ ចំនួន៥.០០០ដុល្លារ លើកទី៤ ចំនួន២.០០០ដុល្លារ លើកទី៥ ចំនួន១.០០០ដុល្លារ លើកទី៦ ចំនួន៥.០០០ដុល្លារ និងលើកទី៧ ចំនួន៣.០០០ដុល្លារ សរុបចំនួន២៥.០០០ដុល្លារ ដោយគ្មានបានលទ្ធផលអ្វីទាំងអស់។នៅក្នុងនោះផងដែរ លោកឧកញ៉ា សង ថន បានចំណាយប្រាក់បន្ថែមចំនួន៨.០០០ដុល្លារទៀត ទៅឲ្យលោក ផេង សិទ្ធី អតីត អភិបាល ស្រុកគាស់ក្រឡក្នុងការចាយវាយ ទៅលើកម្លាំងជំនាញដែលបានចុះវាស់វែងលើផ្ទៃដីដែលត្រូវប្រគល់ឲ្យ សម្តេច ស ខេង និងវាស់វែង លើផ្ទៃដីដែនៅសល់ ក្នុងការចេញប័ណ្ណកម្មសិទ្ធិស្របច្បាប់ជូនដល់លោកផ្ទាល់។នៅថ្ងៃទី២៥ ខែកក្កដា ឆ្នាំ២០១៧ ក្រសួងមហាផ្ទៃបានចេញ ស ជ ណ ១ច្បាប់ លេខ ១២៣២ ដោយមានចុះហត្ថលេខា របស់សម្ដេច ស ខេង ផងដែរ ព្រមទាំងបានឯកភាពតាមសំណើរបស់សាលាខេត្តបាត់ដំបង និងបានប្រគល់នាទីនេះទៅរដ្ឋបាលខេត្តជាអ្នកអនុវត្ត។ក្រោយមក នៅពេលដែលលោកឧកញ៉ា សង ថន បានឃើញ ស ជ ណ របស់ក្រសួងមហាផ្ទៃ គឺលោកមានការខកចិត្តយ៉ាងខ្លាំងទៅលោក ស៊ូ អារ៉ាហ្វាត់ ដែលមានបំណងស៊ីដាច់ដីរបស់លោក មិនត្រឹមតែប៉ុណ្ណឹងទេ ថែមទាំងមានរឿង មិនប្រក្រតីមួយចំនួនទៀតដូចជា ដីដែលត្រូវប្រគល់ទៅសម្ដេច គឺអង្គភាពជំនាញបានចុះលេខក្បាលដីត្រឹមត្រូវ ( និយាមការ ) ដោយឡែកក្បាលដីរបស់លោកគឺគេចុះតែអក្សរ A B C D តែប៉ុណ្ណោះ ដែលបញ្ហានេះ បើតាមប្រភពអ្នកច្បាប់មួយចំនួនបានលួចខ្សឹបថា គេមានបំណងស៊ីដាច់ដីទាំងអស់ បើលោកឧកញ៉ាមិនបានចាប់អារម្មណ៍លើចំណុចនេះ ព្រោះការចុះវាស់វែងក្នុងពេលតែមួយ ហេតុអ្វីបានជាជំនាញមានគម្រោងបែបនេះទៅវិញ គឺនេះជាចេតនាសុទ្ធសាធ។បន្ទាប់ពីបានបែកធ្លាយរឿងដ៏អាស្រូវនេះរួចមក លោកឧកញ៉ា បានឡើងទៅខុទ្ទកាល័យ សម្ដេច ស ខេង ដើម្បីសុំពិនិត្យថា តើ ឯកសារប្រគល់ដីរបស់លោក គឺរដ្ឋបាលខេត្ត បានបញ្ជូនភ្ជាប់មកជាមួយដែរឬទេ តាមពិតគឺគ្មានទាល់តែសោះ មានន័យថា លោក ស៊ូ អារ៉ាហ្វាត់ ទទួលបានហើយ ទើបយកទៅក្លែងឯកសារថ្មីហើយបញ្ជូនទៅ សម្ដេច។ដោយសារតែមានបញ្ហាបែបនេះ ទើបលោក សង ថន បានដាក់ពាក្យបណ្ដឹងនៅក្រសួងមហាផ្ទៃ ដោយបានស្នើសុំផ្អាកការប្រគល់ដីនេះជាបណ្ដោះអាសន្ន ហើយស្នើសុំឲ្យ លោក ស៊ូ អារ៉ាហ្វាត់ ដែលជាអភិបាលខេត្តរង ប្រគល់នូវទឹកប្រាក់ចំនួន២៥.០០០ដុល្លារ មកឲ្យលោកវិញសិនដែរ។ដោយឡែកនៅខេត្តបាត់ដំបង គឺលោកឧកញ៉ា បានដាក់ពាក្យប្តឹងចូលទៅតុលាការហើយដើម្បីឲ្យតំណាងអយ្យការជួយរកយុត្តិធម៌។បើតាមប្រភពច្បាស់ការមួយចំនួនបានបង្ហើបថា តុលាការខេត្តបាត់ដំបង អាចមិនចាត់ការលើសំណុំរឿងនេះ ដោយបានស្នើសុំឲ្យ លោកឧកញ៉ា ឡើងទៅដាក់ពាក្យប្តឹងនៅឯសាលាឧទ្ធរណ៍វិញ ព្រោះបើតុលាការខេត្ត ធ្វើការលើសំណុំរឿងនេះ វាអាចជាប់ពាក់ព័ន្ធដល់មន្ត្រីជាច្រើនរូបទៀត ព្រោះអំពើពុករលួយនេះ វាអាចជាប្រព័ន្ធ ដូចសម្លកំពិសយ៉ាងដូច្នេះដែរ បច្ចុប្បន្នមជ្ឈដ្ឋានជាច្រើនកំពុងរង់ចាំមើលថា តើច្បាប់ហ៊ានចាត់ការទៅលើមន្ត្រីធំៗដែលប្រព្រឹត្តល្មើសច្បាប់ដែរឬទេ?បន្ទាប់ពីរឿងនេះ ត្រូវបានបែកធ្លាយតាមបណ្តាញសារព័ត៌មានធំៗក្នុងស្រុករួចមក ថ្មីៗនេះក្រសួងមហាផ្ទៃបានចេញ ស ជ ណ ១ច្បាប់ទៀត លេខ ២០៥០ ចុះថ្ងៃទី៣ ខែធ្នូ ឆ្នាំ២០១៨ ដោយសម្តេចក្រឡាហោម ស ខេង ជម្រាបជូនទៅ លោក សង ថន ជុំវិញករណីសុំឲ្យកែប្រែ លិខិតលេខ ១២៣២ ស ជ ណ ចុះថ្ងៃទី២៥ ខែកក្កដា ឆ្នាំ២០១៧ របស់ក្រសួងមហាផ្ទៃ ដែលលោក បានប្តឹងទៅលោក ស៊ូ អារ៉ាហ្វាត់ អភិបាលរងខេត្ត និងលោក ទា គឹមហុង អតីតទីប្រឹក្សាក្រសួងមហាផ្ទៃ ជុំវិញការកាត់ដីចំនួន២៥០០ហិកតា នៅតំបន់ឃុំឆ្នាលមាន់ ឃុំដូនបា និងឃុំព្រះផុស ស្រុកគាស់ក្រឡ ខេត្តបាត់ដំបង។នៅក្នុងខ្លឹមសារនៃ ស ជ ណ បានបញ្ជាក់ថា បច្ចុប្បន្នក្រសួងបានណែនាំដល់រដ្ឋបាលខេត្តបាត់ដំបងហើយ ឲ្យសិក្សា ពិនិត្យ និងដោះស្រាយ ដោយផ្អែកលើគោលការណ៍នានាដែលបានដាក់ចេញកន្លងមក។ ចំពោះបណ្តឹងដែលលោក សង ថន បានប្តឹងទៅលើលោក ស៊ូ អារ៉ាហ្វាត់ និងលោក ទា គឹមហុង ពីបទ ឆបោក និងរំលោភលើសេចក្តីទុកចិត្តនោះ ក្រសួងមហាផ្ទៃសូមទុកជូនទៅសាលាដំបូងខេត្តបាត់ដំបង ចាត់ចែងទៅតាមសមត្ថកិច្ច និងនីតិវិធីជាធរមាន។គួរបញ្ជាក់ដែរថា កន្លងមក កាលពីអំឡុង ខែសីហា ឆ្នាំ២០១៨នេះ លោក ទា គឹមហុង ត្រូវបានតំណាងអយ្យការ សាលាដំបូងរាជធានីភ្នំពេញ កោះហៅឲ្យចូលខ្លួនទៅបំភ្លឺផងដែរ ជុំវិញករណី « ឆបោក និង សមគំនិត » មិនត្រឹមតែប៉ុណ្ណោះនោះទេ បុគ្គលរូបនេះហ៊ានដាក់ពាក្យប្តឹងទាំងបំពាន ទៅលើអ្នកសារព័ត៌មានក្នុងស្រុកថែមទៀត ក្រោយពីបានសរសេរចំៗទៅលើករណី ឆបោក ដែលលោកបានប្រព្រឹត្តនាពេលកន្លងមក ប៉ុន្តែពេលនេះគេកំពុងរង់ចាំមើលថា តើច្បាប់អាចមានវិធានការទៅលើបុគ្គលមានអំណាចធំៗបែបនេះបានដែរឬទេ?៕
ចំនួនអ្នកទស្សនា
ព័ត៌មានគួរចាប់អារម្មណ៍
(បាត់ដំបង)៖ ក្រសួងសុខាភិបាល និងអង្គការសុខភាពពិភពលោក ក្នុងពេលបំពេញបេសកកម្ម នៅខេត្តបាត់ដំបង បានសម្តែងនូវការកោតសរសើរ ចំពោះការលះបង់ដ៏ធំធេងរបស់ក្រុមគ្រូពេទ្យ ..... (សហការីtnc)
ភ្នំពេញ ៖ តុលាការកាត់ទោសឧកញ៉ា សុខ ប៊ុន និងមន្ត្រីអាជ្ញាធរកោះរ៉ុង៥នាក់ ក្លែងឯកសាររំលោភយកដីរដ្....ឋ (សហការីTNC)
(ភ្នំពេញ)៖ បើកបរដោយការប្រុងប្រយត្ន័រក្សាជីវិតអ្នកនិងអ្នកដ៏ទៃ! ស្លាប់៧នាក់ និងរបួស៩នាក់ ក្នុងគ្រោះថ្នាក់ចរាចរណ៍ទូទាំងប្រទេសថ្ងៃទី២២ ខែមិថុនាម្សិលមិញ..... (សហការីTNC)
(ភ្នំពេញ)៖ រដ្ឋាភិបាលជប៉ុន ផ្តល់ជំនួយសង្គ្រោះបន្ទាន់ដល់កម្ពុជា ជាង៦លានដុល្លារ.,. (សហការីTNC)
ពេលនេះផ្លូវជាតិលេខ ១០ ថ្មី ពីសំឡូតមកកោះកុង ចាប់ផ្តើមចេញរូបរាងបណ្តើរៗ (សហការីTNC)
វីដែអូ